ജോര്‍ജിയയില്‍ ഒരുപാട് വൈകിയാണ് നേരം വെളുക്കുന്നത്‌.. 7.30 ആയിട്ടാണ് തെരുവുകളില്‍ വെളിച്ചം വീണത്‌ .. അതിനു വളരെ മുന്‍പ് തന്നെ തെരുവില്‍ വീണു കിടക്കുന്ന ഇലകള്‍ അടിച്ചു വാരുന്ന തൊഴിലാളികളെ കണ്ടു. കൊടും തണുപ്പില്‍ ദേഹമോട്ടുക്കും കമ്പിളി കൊണ്ട് മൂടി മുട്ട് വരെയുള്ള ഷൂസ് ഇട്ടു ജോലി ചെയ്യുന്നവര്‍.. കടുപ്പമേറിയ ജോര്‍ജിയന്‍ കോഫി കുടിച്ചുകൊണ്ട് തെരുവില്‍ ജോലി ചെയ്യുന്ന ആളുകളെ നോക്കി കുറച്ചു നേരം ഞാനിരുന്നു.

Breakfast ഹോട്ടലില്‍ നിന്നും കഴിച്ചു 10 മണിക്ക് റെഡി ആയി . കൃത്യ സമയത്ത് തന്നെ തലേന്ന് കണ്ട ജോര്‍ജി കാറുമായി എത്തി. കൂടെ സന്തോഷം തുടിക്കുന്ന മുഖത്തോടെ , മനോഹരമായി ചിരിച്ചു കൊണ്ട് അന്നത്തെ ഞങ്ങളുടെ ഗൈഡ്..  മേരി എന്ന ജോര്‍ജിയന്‍ സുന്ദരി.. ഇന്ത്യക്കാര്‍ ആണെന്ന് പറഞ്ഞപ്പോള്‍ നമസ്കാര്‍ എന്ന് പറഞ്ഞു ..

തെരുവില്‍ അപ്പോഴേക്കും തിരക്കായിരുന്നു.. നല്ല ട്രാഫിക്‌ ഉണ്ട്.  തലേന്ന് കണ്ട freedom square ചുറ്റി കാര്‍ പ്രധാന റോഡിലേക്ക് കയറി.  കുറച്ചു മുന്നോട്ട് പോയി, ടിബിലിസിയിലെ പ്രധാന ടൂറിസ്റ്റ് സ്പോട്ടായ പീസ്‌ ബ്രിഡ്ജിനു താഴെയാണ് ആദ്യം കാര്‍ നിര്‍ത്തിയത്.  ടൌണിലൂടെ സഞ്ചരിക്കുന്ന ആരും പെട്ടന്ന് ശ്രദ്ധിക്കുന്ന ഒരു നടപ്പാലമാണ് പീസ്‌ ബ്രിഡ്ജ്,  സ്ടീലും ഗ്ലാസ്സും ഉപയോഗിച്ച് ഇറ്റാലിയന്‍ ആര്‍ക്കിടെക്ട്റ്റ് Micheli De Lucchi യാണ് വില്ലിന്റെ ആകൃതിയില്‍ മനോഹരമായി ഈ പാലം നിര്‍മ്മിച്ചിരിക്കുന്നത്. 450 അടി നീളമുള്ള ഈ പാലം 2010 ലാണ്  ജനങ്ങള്‍ക്ക്‌ തുറന്നു കൊടുത്തത് .

   തുര്‍ക്കിയില്‍  ഉത്ഭവിച്ചു ജോര്‍ജിയയിലൂടെ ഒഴുകി അസര്‍ബൈജാന്‍ വഴി കാസ്പിയന്‍ കടലില്‍ അവസാനിക്കുന്ന ഏതാണ്ട് 1500 Km നീളമുള്ള കൂര നദിക്കു കുറുകെയാണ് ഈ പാലം .  കൂര നദിയുടെ ഏറ്റവും ആഴം കൂടിയ ഭാഗമാണ് ടിബിലിസി സിറ്റിയില്‍ .    വളഞ്ഞും പുളഞ്ഞും സിറ്റിയിലൂടെ  ഒഴുകുന്ന  കൂര നദി ഭംഗിയേറിയ കാഴ്ചയാണ്. ഇരു വശവും കെട്ടി പൊക്കി നടപ്പാതകള്‍ നിര്‍മ്മിച്ചിട്ടുണ്ട്. ഇരു കരയിലും വന്‍ മരങ്ങള്‍ നട്ടു പിടിപ്പിച്ചിട്ടുമുണ്ട്.  വിശ്രമിക്കാന്‍ അങ്ങിങ്ങ് ബഞ്ചുകള്‍..  ചുവന്ന ഇലകളുമായി  ഇരു വശങ്ങളിലും നില്‍ക്കുന്ന  മരങ്ങള്‍ കൂര നദിയുടെ സൗന്ദര്യം വര്‍ധിപ്പിക്കുന്നു. അത് ഒട്ടും കുറയ്ക്കാത്ത രൂപത്തിലാണ് പീസ്‌ ബ്രിഡ്ജ് നിര്‍മ്മിച്ചിരിക്കുന്നത്. പച്ച നിറമാണ് ബ്രിഡ്ജിന് .  മുകളില്‍ ഇട്ടിരിക്കുന്ന ഗ്ലാസിന്റെ നിറമാണത് . രാത്രിയില്‍ LED lights വഴി ബ്രിഡ്ജ് ചുവപ്പ് നിറമാക്കും.  റോഡിന്റെ മറുവശത്തുള്ള Rike പാര്‍ക്കിലെക്കാണ് പീസ്‌ ബ്രിഡ്ജ് ചെന്നിറങ്ങുന്നത്. ഞങ്ങള്‍ ചെന്ന സമയത്ത് വളരെ കുറച്ചു സന്ദര്‍ശകര്‍ മാത്രമേ അവിടെ ഉണ്ടായിരുന്നുള്ളു.

പതിവിനു വിപരീതമായി 2 ദിവസം കൊണ്ട് തീരുമാനിച്ച യാത്രയായിരുന്നു ജോര്‍ജിയയിലേക്ക്.  കുറെ നാളുകള്‍ക്ക് മുന്നേ ഇങ്ങനെ ഒരു ആഗ്രഹം മനസ്സില്‍ ഉണ്ടായിരുന്നെങ്കിലും അതിനു വേണ്ടി ഒരുക്കങ്ങള്‍ തുടങ്ങിയിട്ടില്ലായിരുന്നു.  സഹോദരിയും കുടുംബവും നേരത്തെ പ്ലാന്‍ ചെയ്ത യാത്രയിലേക്ക് അവസാന നിമിഷം ഞാന്‍ ചേരുകയാണ് ചെയ്തത്.

GCC രാജ്യങ്ങളിലുള്ളവര്‍ക്ക് താരതമ്യേനെ കുറഞ്ഞ ചിലവില്‍ പോയി വരാവുന്ന മനോഹരമായ രാജ്യമാണ് ജോര്‍ജിയ.  അത് കൊണ്ട് തന്നെ ഗള്‍ഫ് രാജ്യങ്ങളില്‍ നിന്ന് നിരവധി പേര്‍ ഇവിടം സന്ദര്‍ശിക്കുന്നുണ്ട്. ഇന്ത്യക്കാര്‍ക്ക് നേരത്തെ വിസ എടുക്കേണ്ടതുണ്ട്‌. എന്നാല്‍ GCC resident ആണെങ്കില്‍ വിസ ഇല്ലാതെ നേരിട്ട് ജോര്‍ജിയയില്‍ ഇറങ്ങാം.  എയര്‍ അറേബ്യയും ഫ്ലൈ ദുബായിയുമാണ് ഏറ്റവും ചെറിയ നിരക്കില്‍ ജോര്‍ജിയയിലേക്ക് സര്‍വീസ് നടത്തുന്നത്.  ഇന്ത്യയില്‍ നിന്ന് പോവുമ്പോള്‍ ചെലവ് കൂടുതലാണ്. പ്രധാനപ്പെട്ട ഇന്ത്യന്‍ സിറ്റികളില്‍ നിന്നൊന്നും നേരിട്ട് ജോര്‍ജിയയിലേക്ക് വിമാന സര്‍വീസ് ഇല്ല എന്ന് തോന്നുന്നു.  20-24 മണിക്കൂര്‍ എടുത്തു പല സ്ഥലങ്ങളില്‍ നിന്നുള്ള കണക്ഷന്‍ ഫ്ലൈറ്റ് എടുത്തുള്ള യാത്ര ചിലവേറിയതാണ്.  ജോര്‍ജിയയിലേക്കുള്ള യാത്രക്കും  താമസത്തിനുമുള്ള ചെലവ് കുറവ് പക്ഷെ ഷോപ്പിംഗ്‌, ഭക്ഷണം തുടങ്ങിയവയ്ക്കില്ല..

ജോര്‍ജിയയില്‍ പോവുന്നവര്‍ ഡോളര്‍ കയ്യില്‍ കരുതുന്നതാണ് നല്ലത് . GEL എന്ന ചുരുക്ക പേരില്‍ അവര്‍ വിളിക്കുന്ന Georgian Lari മറ്റു നാടുകളിലെ Money exchange ല്‍ കിട്ടാന്‍ പ്രയാസമാണ്. അത് പോലെ തന്നെ അവിടത്തെ exchange ല്‍ ദിര്‍ഹം/ റിയാല്‍ ഒന്നും തന്നെ ഇല്ല.. ഒരു GEL ഏതാണ്ട് 29 രൂപയാണ്.


മറ്റൊരു രാജ്യത്തേക്ക് പോവും മുന്നേ നമ്മള്‍ അന്വേഷിക്കുന്ന പ്രധാന കാര്യമാണ് സുരക്ഷ.. ജോര്‍ജിയയിലെ ജനങ്ങള്‍ വളരെ സൗമ്യരാണ്. ഭൂമിയോളം വിനയം ഉള്ളവര്‍. ആരുടേയും മനം കവരാന്‍ കഴിവുള്ളവരാണവര്‍. എന്നാല്‍ ഊരും പേരുമില്ലാത്ത നാടോടികള്‍ നിരവധി ഉണ്ടവിടെ.. അവര്‍ പ്രശ്നക്കരാണ്. ചെറിയ കുട്ടികള്‍ ആണെങ്കിലും Professional ക്രിമിനലുകളാണ്.. കൂട്ടം ചേര്‍ന്ന് വളഞ്ഞു കണ്ണടച്ച് തുറക്കുന്നതിനു മുന്നേ പോക്കറ്റടിക്കാന്‍ മിടുക്കന്മാര്‍. സ്വദേശികളും വിദേശികളും അവരെ കൊണ്ട് നന്നേ കഷ്ടപ്പെടുന്നുണ്ട്. എന്നാല്‍ കുട്ടികളാണ്, മതിയായ ഒരു രേഖയും അവരുടെ കയ്യില്‍ ഇല്ലാതെ ജയിലില്‍ അടക്കാന്‍ കഴിയില്ല എന്ന ന്യായം പറഞ്ഞു കൊണ്ട് അവരെ യഥേഷ്ടം വിഹരിക്കാന്‍ വിട്ടിരിക്കുന്നു എന്നത് ഒരു രാജ്യത്തിന് ഒട്ടും ഭൂഷണമല്ല. അവര്‍ ജോര്‍ജിയക്കാരല്ല എന്ന് അവിടത്തുകാര്‍ ന്യായം പറയുന്നത് സന്ദര്‍ശകര്‍ക്ക് ദഹിക്കാന്‍ ബുദ്ധിമുട്ടാണ്. പോലീസില്‍ പരാതിപ്പെടാന്‍ വലിയ കടമ്പകളാണ്. ഇംഗ്ലീഷ് കൈകാര്യം ചെയ്യാന്‍ അറിയുന്നവര്‍ പോലീസില്‍ തീരെ ഇല്ലെന്നു തന്നെ പറയാം. അവര്‍ക്ക് official translators ഉണ്ട്. അവര്‍ വരുന്നതിനു വേണ്ടി ചിലപ്പോള്‍ മണിക്കൂറുകള്‍ കാത്തിരിക്കേണ്ടി വരും. ഇതെല്ലാം കഴിഞ്ഞാലും വളരെ തണുത്ത, ആത്മാര്‍ഥതയുടെ അംശം പോലും ഇല്ലാത്ത പ്രതികരണമാണ് പോലീസില്‍ നിന്ന് ലഭിക്കുക.. അതിനാല്‍ സ്വന്തം സുരക്ഷ സ്വയം ഉറപ്പു വരുത്തേണ്ടതുണ്ട്. ഈ നാടോടികള്‍ക്ക് പുറമേ മിക്ക സ്ഥലങ്ങളിലും ഭിക്ഷക്കാരെ കാണാം. അടുത്തുവന്നു ഇരന്നു കൊണ്ടേയിരിക്കും.. അസുഖം മൂലം കിടപ്പിലായ കുട്ടികള്‍ ഉള്‍പ്പെടെയുള്ളവരെ വീല്‍ ചെയറിലും കട്ടിലുകളിലുമെല്ലാം പ്രദര്‍ശിപ്പിച്ചാണ് ഭിക്ഷാടനം.  സന്ദര്‍ശകര്‍ക്ക് അസ്വസ്ഥതയുണ്ടാക്കുന്ന കാര്യങ്ങളാണ് ഇവയെല്ലാം.

1991 ഇല്‍ റഷ്യയില്‍ നിന്നും സ്വാതന്ത്ര്യം പ്രഖ്യാപിച്ചു വേര്‍തിരിഞ്ഞ 15 രാജ്യങ്ങളില്‍ ഒന്നാണ് ജോര്‍ജിയ. 1980 കളില്‍ വരെ ജോര്‍ജിയയുടെ പല ഭാഗങ്ങളിലും വൈദ്യുതി പോലും ഉണ്ടായിരുന്നില്ല.  വളര്‍ച്ചാ മുരടിപ്പില്‍ നിന്നുള്ള അമര്‍ഷം ആയിരിക്കാം റഷ്യയില്‍ നിന്നും പിരിഞ്ഞു പോരാന്‍ അവരെ പ്രേരിപ്പിച്ചത്. സ്വാതന്ത്ര്യത്തിനു ശേഷവും കാര്യങ്ങള്‍ അത്ര പന്തി ആയിരുന്നില്ല. അഭ്യന്തര പ്രശ്നങ്ങളും പിന്നീട് റഷ്യയുമായുള്ള പ്രശ്നങ്ങളും ജോര്‍ജിയയെ ഉലച്ചു കളഞ്ഞു.. എന്നാല്‍ പിന്നീട് അവയില്‍ നിന്നെല്ലാം പതിയെ കരകയറി, ലക്ഷക്കണക്കിന്‌ സഞ്ചാരികളെ ആകര്‍ഷിക്കുന്ന ഒരു രാജ്യത്തിലേക്ക് അവര്‍ വളര്‍ന്നു. തുര്‍ക്കി, അര്‍മേനിയ , അസര്‍ബൈജാന്‍, റഷ്യ എന്നിവയാണ് ജോര്‍ജിയയുടെ അയല്‍രാജ്യങ്ങള്‍. ഈ രാജ്യങ്ങളില്‍ നിന്നുള്ളവര്‍ നിരവധി പേര്‍ ജോര്‍ജിയയില്‍ താമസിക്കുന്നുണ്ട്. തെരുവുകളില്‍ ഇറങ്ങി നടന്നാല്‍ ഈ നാട്ടുകാരെയെല്ലാം കാണാന്‍ കഴിയും


ഷാര്‍ജയില്‍ നിന്നും ഫ്ലൈറ്റ് പൊങ്ങിയ ശേഷം കുറച്ചു നേരം ഉറങ്ങി.. ഉണര്‍ന്നു  പുറത്തേക്കു നോക്കിയപ്പോള്‍ തന്നെ എന്താണ് ജോര്‍ജിയ ഞങ്ങള്‍ക്ക് വേണ്ടി ഒരുക്കി വച്ചിരിക്കുന്നതെന്ന് നേരത്തെ മനസിലാക്കാന്‍ കഴിഞ്ഞു. എങ്ങു നോക്കിയാലും മഞ്ഞില്‍ പുതഞ്ഞു നില്‍ക്കുന്ന മല നിരകള്‍.. വെള്ള നിറത്തില്‍ അല്ലാത്ത ഒറ്റ മലനിരകള്‍ പോലുമില്ല.. കനത്ത മേഘങ്ങള്‍ക്കിടയിലൂടെ ടിബിലിസി എയര്‍പോര്‍ട്ടിലേക്ക് വിമാനം താഴുമ്പോള്‍ വൈകീട്ട് 4.30. മൂടിക്കെട്ടിയ അന്തരീക്ഷമാണ്.. സൂര്യന്‍റെ നിഴല്‍ പോലും ഇല്ല. നേരിയ മഴയും ഉണ്ടായിരുന്നു. യൂറോപ്യന്‍ സ്റ്റൈല്‍ വീടുകളും കെട്ടിടങ്ങളും പല വര്‍ണ്ണങ്ങളില്‍ തലയുയര്‍ത്തി നില്‍ക്കുന്നത് രസകരമായ കാഴ്ചയാണ്. അറബ് രാജ്യങ്ങളിലെ പോലെ കെട്ടിടങ്ങള്‍ തിങ്ങി തിങ്ങിയല്ല നില്‍ക്കുന്നത്.. വിശാലമായ സ്ഥലത്ത് അങ്ങിങ്ങ് കെട്ടിടങ്ങള്‍ . ജോര്‍ജിയയിലെ നാല് അന്താരാഷ്ട്ര വിമാനത്താവളങ്ങളില്‍ ഒന്നാണ് തലസ്ഥാന നഗരിയായ ടിബിലിസിയിലെ  എയര്‍പോര്‍ട്ട്.  പക്ഷെ തിരക്ക് വളരെ കുറവ്. Emigration procedures എല്ലാം വളരെ സിമ്പിള്‍..  പുറത്തു ഇറങ്ങിയപ്പോള്‍ തന്നെ തണുപ്പ് തുളച്ചു കയറി..

പുറത്തു ഞങ്ങളുടെ പേര് എഴുതിയ ബോര്‍ഡും കൊണ്ട് ട്രാവല്‍ agent നില്‍ക്കുന്നുണ്ടായിരുന്നു. ജോര്‍ജി എന്ന്  വിളിക്കുന്ന ജോര്‍ജ്.  മറ്റു എല്ലാ ജോര്‍ജിയക്കാരെയും പോലെ സുമുഖന്‍.. ഇംഗ്ലീഷ് തരിമ്പും അറിയില്ല.  ഏതു ഭാഷയാണ്‌ ജോര്‍ജിയക്കാര്‍ സംസാരിക്കുന്നതെന്ന ഞങ്ങളുടെ ചോദ്യത്തിനു ജോര്‍ജിയുടെ  നാടിന്‍റെ പേരാണ് മറുപടി പറഞ്ഞത് :-)

ജോര്‍ജിയയില്‍ Left hand Driving ആണെങ്കിലും Right handed വാഹനങ്ങള്‍ ധാരാളമുണ്ട്. വളരെ കൂള്‍ ആയി Right handed വാഹനങ്ങള്‍ left hand വാഹനങ്ങള്‍ക്കിടയില്‍ അവര്‍ ഓടിക്കുന്നു.. വീതി കുറവാണെങ്കിലും മികച്ച റോഡുകള്‍.  Divider കള്‍ക്ക് പകരം റോഡില്‍ വരച്ച വലിയ വര കൊണ്ടാണ് രണ്ടു വശത്തെക്കുള്ള ഗതാഗതം വേര്‍തിരിച്ചിരിക്കുന്നത്. എല്ലാ പ്രമുഖ കമ്പനികളുടെയും വാഹനങ്ങള്‍ റോഡില്‍ കാണാം.  മഞ്ഞ നിറത്തിലുള്ള tempo traveler ആണ് ഇവിടത്തെ പബ്ലിക്‌ ട്രാന്‍സ്പോര്‍ട്ട് വാഹനങ്ങള്‍.


ജോര്‍ജിയന്‍ തെരുവുകളില്‍ ഏറ്റവും കൂടുതല്‍ കാണപ്പെടുന്ന കടകള്‍ വൈന്‍ ഷോപ്പുകളാണ്.  ലോകത്തെ തന്നെ പ്രമുഖ വൈന്‍ നിര്‍മാതാക്കളില്‍ ഒന്നാണ് ജോര്‍ജിയ.   ഗൈഡ് പറഞ്ഞത് സത്യമാണെങ്കില്‍ 700 ഓളം മുന്തിരി വര്‍ഗ്ഗങ്ങള്‍ ജോര്‍ജിയക്ക്‌ മാത്രമായി ഉണ്ട്. 40 ഓളം രാജ്യങ്ങളിലേക്ക്  അവ കയറ്റി അയക്കുന്നുണ്ടത്രേ.  ഉള്‍നാടുകളിലെ വീടുകള്‍ക്ക് മുന്നിലെല്ലാം പടര്‍ന്നു നില്‍ക്കുന്ന മുന്തിരി വള്ളികള്‍ കാണാം


ഡിന്നര്‍ കഴിച്ചു കുറച്ചു നേരം തെരുവിലൂടെ ഇറങ്ങി നടന്നു. പകുതിയില്‍ ഏറെയും ക്രിസ്ത്യാനികള്‍ ആണെങ്കിലും മറ്റു മത വിഭാഗങ്ങളും അവരുടെ ആരാധനാ കേന്ദ്രങ്ങളും ജോര്‍ജിയയിലുണ്ട്. വഴി വക്കില്‍ കണ്ട ഒരു ജൂത പള്ളിയാണ് താഴെ. പ്രത്യേക ലൈറ്റ് arrangement ല്‍ തിളങ്ങി നില്‍ക്കുന്ന പള്ളിക്ക് മുകളില്‍ ചന്ദ്രന്‍ ഉദിച്ചിരുന്നു..


പിറ്റേന്നത്തെ  ടിബിലിസി സിറ്റി ടൂറിനു വേണ്ടി രാവിലെ ഫ്രഷ്‌ ആയി എഴുന്നേല്‍ക്കണം.  യാത്രാക്ഷീണം ഉറങ്ങി തീര്‍ക്കണമല്ലോ.. തണുപ്പില്‍ മൂടി പുതച്ചു ഉറങ്ങാനായി നേരെ റൂമിലേക്ക്‌..

ടിബിലിസി സിറ്റി വിശേഷങ്ങള്‍ അടുത്ത ഭാഗത്തില്‍ വായിക്കാം

യാത്രകള്‍ എപ്പോഴും സുഖകരമായ ഒരു അനുഭൂതിയാണ്. ഒരു യഥാര്‍ത്ഥ സഞ്ചാരിക്ക് യാത്രയെ കുറിച്ച് ആലോചനകള്‍ തുടങ്ങുമ്പോള്‍ തന്നെ ആ അനുഭൂതി അനുഭവിച്ചു തുടങ്ങാന്‍ കഴിയും.  ഒരു യാത്ര മികച്ചതാവാന്‍ പല കാര്യങ്ങള്‍ ഒത്തുചേരേണ്ടതുണ്ട്.  അതില്‍ പ്രധാനപ്പെട്ട ഒന്നാണ് ഫോട്ടോഗ്രഫി.. യാത്രകള്‍ക്കിടയില്‍ ഒരു മൊബൈല്‍ ഫോട്ടോയെങ്കിലും എടുക്കാത്തവര്‍ ഉണ്ടാവില്ലല്ലോ.. യാത്രക്കിടയിലുള്ള കാഴ്ചകളും അനുഭവങ്ങളും അവസാനിക്കുമ്പോള്‍ ആ ഓര്‍മ്മകളെ സജീവമായി നിലനിര്‍ത്തുന്നത് ഫോട്ടോഗ്രഫിയാണ്.. യാത്രക്കിടയില്‍ ഫോട്ടോകള്‍ എടുക്കുന്നവരും ഫോട്ടോകള്‍ എടുക്കാന്‍ വേണ്ടി യാത്ര ചെയ്യുന്നവരുമുണ്ട്. ഫോട്ടോകള്‍ എടുക്കാന്‍ വേണ്ടി യാത്ര ചെയ്യുന്നവര്‍ക്കാണ് യാത്രയ്ക്ക് കൂടുതല്‍ മുന്നൊരുക്കം ആവശ്യമുള്ളത് .. മികച്ച ഫോട്ടോകള്‍ ലഭിച്ചില്ലെങ്കില്‍ യാത്രയുടെ പൂര്‍ണ്ണത കൈവരില്ല ഇത്തരക്കാര്‍ക്ക്..  പലപ്പോഴും മനസ്സില്‍ ഉദ്ദേശിച്ച പോലെയുള്ള ചിത്രങ്ങള്‍ ആയിരിക്കില്ല നമുക്ക് ലഭിക്കുന്നത്..  വേണ്ടവിധം മുന്നൊരുക്കങ്ങള്‍ നടത്തിയാല്‍ യാത്രയില്‍ നമുക്ക് ലഭിക്കുന്ന ചിത്രങ്ങള്‍ കൂടുതല്‍ മികച്ചവയാക്കാന്‍ കഴിയും.

1. യാത്രാ പ്ലാനിംഗ് :-

സ്ഥിരമായി ആളുകള്‍ പോയികൊണ്ടിരിക്കുന്ന സ്ഥലങ്ങള്‍ക്ക് പകരം സ്വന്തം അഭിരുചിക്കനുസരിച്ചാണ് പോവേണ്ട സ്ഥലങ്ങള്‍ തിരഞ്ഞെടുക്കേണ്ടത്.. ചിലര്‍ക്ക് വന്‍ നഗരങ്ങള്‍ , ചിലര്‍ക്ക് കൂടുതല്‍ ശാന്തതയുള്ള സ്ഥലങ്ങള്‍, ചിലര്‍ക്ക് ചരിത്ര പ്രാധാന്യം ഉള്ളവ, ബീച്ച്, കാട് എന്നിങ്ങനെ ഓരോരുത്തരുടെയും അഭിരുചികള്‍ വ്യത്യസ്തമായിരിക്കും.. ഇതു തരം സ്ഥലമാണ് ഇഷ്ടം കൂടുതലെങ്കില്‍ അത്തരം സ്ഥലങ്ങള്‍ക്ക് വേണ്ടി അന്വേഷിക്കാം.. ഗൂഗിള്‍ സേര്‍ച്ച്‌ ചെയ്‌താല്‍ ഇക്കാര്യത്തില്‍ കൂടുതല്‍ വ്യക്തമായ വിവരങ്ങള്‍ ലഭിക്കും.. പോവേണ്ട സ്ഥലം തീരുമാനമായാല്‍ പിന്നെ ഏറ്റവും അനുയോജ്യമായ സീസണ്‍ഏതാണെന്ന് നോക്കാം.. പോവാന്‍ ഉദ്ദേശിക്കുന്ന സ്ഥലം ഏതു സീസണില്‍ ആണ് ഏറ്റവും ഭംഗി എന്ന് അന്വേഷിക്കാം.. കൂടുതല്‍ മികച്ച സീസണില്‍ പക്ഷെ യാത്ര കൂടുതല്‍ ചിലവേറിയതായിരിക്കും എന്ന് മാത്രം.. കടുത്ത മഴക്കാലങ്ങള്‍ പൊതുവേ യാത്രകള്‍ക്ക് അനുയോജ്യമല്ലെങ്കിലും  മികച്ച ചിത്രങ്ങള്‍ എടുക്കാന്‍ അതൊരു തടസമല്ല. മറ്റു സീസണുകളില്‍ കിട്ടാത്ത ആകര്‍ഷകമായ ചില ചിത്രങ്ങള്‍ മഴക്കാലത്ത് മാത്രമായി ലഭിക്കും.. കൂടുതല്‍ ക്ഷമയും ക്യാമറ കേടാവാതിരിക്കാന്‍ മുന്കരുതലും വേണമെന്ന് മാത്രം.. മഴയ്ക്ക്‌ മുന്നേ ഉരുണ്ടു കൂടുന്ന മേഘങ്ങള്‍,  താല്‍ക്കാലികമായി ഉണ്ടാവുന്ന അരുവികള്‍ തുടങ്ങിയവയെല്ലാം മറ്റു സമയങ്ങളില്‍ കിട്ടില്ലല്ലോ.. മഴക്കാലത്ത്‌ എടുക്കുന്ന ചിത്രങ്ങള്‍ പൊതുവേ നിറങ്ങളും contrast ഉം കൂടിയവയായിരിക്കും ..

മലമ്പുഴ ഡാം പരിസരത്ത് നിന്ന് മഴയ്ക്ക് മുന്നേയും ശേഷവും പകര്‍ത്തിയ ചിത്രങ്ങളാണ് താഴെ




ഏതു കാലാവസ്ഥയിലും നല്ല ചിത്രങ്ങള്‍ കിട്ടും.. അവയെ നമ്മള്‍ കണ്ടെത്തണം എന്ന് മാത്രം.. ഹോങ്കോങ്ങിലെ പോലിംഗ് മോനാസ്റ്റെരി പരിസരത്ത് നിന്നും പെട്ടന്ന് വീണ മഞ്ഞിലും മഴയത്തും എടുത്ത ചിത്രമാണ് താഴെ

മൂത്രാശയ കല്ലുകള്‍ മൂലമുള്ള വേദന അനുഭവിചിട്ടില്ലെങ്കില്‍ പോലും അതിനെ കുറിച്ച് കേള്‍ക്കാത്തവര്‍ ചുരുക്കമായിരിക്കും.. ഏതൊരു ആശുപത്രിയിലെയും അത്യാഹിത വിഭാഗത്തില്‍ എത്തുന്ന കഠിനമായ വയറുവേദനക്കാരില്‍ വലിയൊരു പങ്കു മൂത്രാശയ കല്ലുകള്‍ മൂലമുള്ളവയായിരിക്കും. സര്‍വ്വ സാദാരണമായ ഒരു അസുഖം ആണെങ്കില്‍ പോലും പലപ്പോഴും ഇത്തരം രോഗികള്‍ക്ക് ശരിയായ രീതിയിലുള്ള ചികിത്സ ലഭിക്കുന്നില്ല എന്നതാണ് വാസ്തവം. പലരും വേദന വരുമ്പോള്‍ ആശുപത്രിയില്‍ എത്തി ചികിത്സ തേടി , തല്ക്കാലം വേദന ശമിക്കുന്നതോടെ പിന്നെ അതിനെ കുറിച്ച് അശ്രദ്ദരാവുകയാണ് പതിവ്. എന്നാല്‍ ഇത്തരം അശ്രദ്ധക്ക് ഒരു പക്ഷെ കൊടുക്കേണ്ടി വരുന്ന വില സ്വന്തം കിഡ്നി തന്നെ ആയേക്കാം ,  വേണ്ട വിധത്തിലുള്ള പരിശോധനകളിലൂടെ ഭൂരിഭാഗം കല്ലുകളുടെയും പുറകിലെ കാരണം കണ്ടെത്താന്‍ കഴിയുകയും പിന്നീട് കല്ലുകള്‍ രൂപപ്പെടാതിരിക്കാന്‍ വേണ്ട മുന്‍കരുതലുകളും ചികിത്സയും എടുക്കാന്‍ കഴിയും. വേദന മാറുന്നതോടെ ചികിത്സ അവസാനിപ്പിക്കുമ്പോള്‍ അതിനുള്ള സാധ്യതയാണ് ഇല്ലാതാവുന്നത് .

എങ്ങനെ, എന്തുകൊണ്ട് കല്ലുകള്‍ ഉണ്ടാവുന്നു ?

ശരീരത്തിലെ ആവശ്യത്തില്‍ കൂടുതല്‍ ഉള്ള പല വസ്തുക്കളും കിഡ്നി മൂത്രം വഴി പുറം തള്ളുന്നു. നിരവധി ലവണങ്ങള്‍  അടങ്ങിയ ഒരു ദ്രാവകമാണ് മൂത്രം. എളുപ്പത്തില്‍ വെള്ളത്തില്‍ ലയിക്കുതും അല്ലാത്തവയുമായ ഘടകങ്ങള്‍ മൂത്രത്തില്‍ ഉണ്ട്.  എളുപ്പത്തില്‍ ലയിക്കുന്ന വസ്തുക്കള്‍ മൂത്രം ഒഴുകുന്ന വഴികളില്‍ അടിഞ്ഞു കൂടാതെ വേഗം പുറംതള്ളപ്പെടുന്നു. എന്നാല്‍ ലയിക്കാന്‍ ബുദ്ധിമുട്ടുള്ള വസ്തുക്കളെ കൂടുതല്‍ മൂത്രത്തില്‍ ലയിപ്പിച്ചെടുത്തു അല്‍പസ്വല്‍പ്പം ബുദ്ധിമുട്ടിയാണെങ്കിലും കിഡ്നി പുറംതള്ളുന്നു. ഇത്തരം വസ്തുക്കള്‍ ലയിക്കാതെ അടിഞ്ഞു കൂടാന്‍ ഉള്ള പ്രവണതയില്‍ നിന്നും സ്വയം രക്ഷ നേടാന്‍  തനതായ ചില വഴികളും കിഡ്നിക്ക് അറിയാം.  ലവണങ്ങള്‍ അടിഞ്ഞു കൂടുന്നത് തടയാന്‍ സഹായകമാവുന്ന സിട്രെറ്റ് പോലുള്ള ചില ലവണങ്ങളെ മൂത്രത്തില്‍ ഉള്‍പ്പെടുത്തിയാണ് കിഡ്നി ഇത് സാധ്യമാക്കുന്നത്.

സ്ഥിരമായി കിഡ്നിക്ക് എല്ലാ ലവണങ്ങളെയും വേണ്ടവിധം ലയിപ്പിക്കാന്‍ വേണ്ടത്ര മൂത്രം ഇല്ലാതെ വന്നാല്‍ മൂത്രത്തിന്റെ സാന്ദ്രത വളരെ കൂടാന്‍ ഇടവരുന്നു. ചൂട് കാലത്ത് മൂത്രം കടും മഞ്ഞ നിറത്തില്‍ പോവുന്നത് കണ്ടിട്ടില്ലേ.. വേണ്ട വിധം അളവില്‍ വെള്ളം കുടിക്കാതിരുന്നാല്‍ കുറഞ്ഞ അളവ് മൂത്രത്തില്‍ കൂടുതല്‍ വസ്തുക്കള്‍ ലയിപ്പിച്ചു കിഡ്നി പുറംതള്ളുന്നത് കൊണ്ടാണ് മൂത്രത്തിന് നിറം കൂടുന്നത്. ഇത്തരം അവസ്ഥയില്‍ മൂത്രം ഒഴുകുന്ന വഴികളില്‍ ചില ലവണങ്ങള്‍ അടിഞ്ഞു കൂടാന്‍ സാധ്യത വളരെ കൂടുതല്‍ ആണ്. വളരെ കാലങ്ങളായി ഇങ്ങനെ അടിഞ്ഞു കൂടുന്ന ലവണങ്ങളും നിര്‍ജീവ കോശങ്ങളുമെല്ലാം കൂടി ചേര്‍ന്നാണ് കല്ലായി മാറുന്നത് .  മൂത്രാശയക്കല്ല് ഉള്ള ആളുകളോട് ധാരാളം വെള്ളം കുടിക്കാന്‍ ആവശ്യപ്പെടാന്‍ കാരണം ഇതാണ്.

ഇനി വേണ്ട അളവില്‍ മൂത്രം ഉണ്ടെങ്കില്‍ പോലും കല്ല്‌ ഉണ്ടാവാന്‍ ഉള്ള വേറെ ചില കാരണങ്ങള്‍ ഉണ്ട്.  2.5 തൊട്ടു 3 ലിറ്റര്‍ വരെ മൂത്രം ഒഴിച്ചാല്‍ പോലും ചില അസുഖങ്ങള്‍ കാരണം മൂത്രത്തില്‍ എത്തുന്ന ലവണങ്ങളുടെ അളവ് വളരെ കൂടുതലായി എന്ന് കരുതൂ.. അപ്പോളും യഥാര്‍ത്ഥത്തില്‍  ഉണ്ടാവുന്നത് മൂത്രം കുറവായ പോലെ ഉള്ള ഒരു അവസ്ഥയാണ്.  അളവ് സാധാരണ പോലെ ആണെങ്കിലും സാന്ദ്രത കൂടുതല്‍ ആയിരിക്കും എന്ന് ചുരുക്കം.  ഇത്തരം അസുഖങ്ങള്‍ ചിലത് പാരമ്പര്യമായി കിട്ടുന്നവയാണ്‌.. ചിലത് മറ്റു ചില രോഗങ്ങള്‍ വഴിയും ജീവിത ശൈലി മൂലവുമാണ്. കല്ല്‌ രൂപപ്പെടുന്നത് തടയാന്‍ കിഡ്നി സിട്രേറ്റിനെ ഉപയോഗപ്പെടുത്തുന്നത് പറഞ്ഞല്ലോ..ചില ആളുകളില്‍ ജന്മനാ മൂത്രത്തിലെ സിട്രെറ്റിന്റെ അളവ് കുറവായിരിക്കും. അത്തരക്കാരിലും കല്ലുണ്ടാവാന്‍ സാധ്യത കൂടും. ഇത്തരം അവസ്ഥകളെ  തിരിച്ചറിയല്‍ കല്ലുകളുടെ ചികിത്സയുടെ പ്രധാന ഘടകമാണ്.  നിര്‍ഭാഗ്യവശാല്‍ പല രോഗികളിലും അത് നടക്കുന്നില്ല എന്നതാണ് വസ്തുത .

കല്ലുകള്‍ എവിടെയെല്ലാം കാണപ്പെടാം?

കിഡ്നിയുടെ അകത്താണ് ഭൂരിഭാഗം കല്ലുകളും രൂപം കൊള്ളുന്നത്‌. ഇവ മൂത്രം വഴി ഒഴുകിയിറങ്ങി യുരീറ്റര്‍ എന്ന കുഴലില്‍ തങ്ങി നില്‍ക്കാം.. കിഡ്നിയില്‍ നിന്നും മൂത്ര സഞ്ചി വരെ മൂത്രം എത്തിക്കുന്ന കുഴലുകള്‍ ആണ് യുരീറ്റര്‍.  മൂത്ര സഞ്ചിക്ക് അകത്തും ചിലപ്പോള്‍ കല്ലുകള്‍ രൂപപ്പെടാം. മൂത്ര സഞ്ചിയിലെ കല്ലുകള്‍ ചിലപ്പോള്‍ ഞെട്ടിപ്പിക്കുന്ന വലിപ്പം വരാം.. 17 cm  വരെ വലിപ്പമുള്ള  കല്ലുകള്‍ മൂത്ര സഞ്ചിയില്‍ നിന്ന് പുറത്തെടുക്കപ്പെട്ടിട്ടുണ്ട് .

വിവിധ തരം മൂത്രാശയ കല്ലുകള്‍ ഏതൊക്കെ എന്ന് നോക്കാം

കാല്‍സ്യം കല്ലുകള്‍ :

75 തൊട്ടു 85% കല്ലുകളും വിവിധ തരം കാല്‍സ്യം ലവണങ്ങളാണ്.  പ്രധാനമായും കാത്സ്യം ഫോസ്ഫേറ്റും കാത്സ്യം ഓക്സലെറ്റും.. ചിലപ്പോള്‍ ഇവയുടെ സങ്കരവും.  വിവിധ കാരണങ്ങള്‍ കൊണ്ട് കാല്‍സ്യം കല്ലുകള്‍ രൂപപ്പെടാം.  ഏറ്റവും പ്രധാന കാരണം Idiopathic Hypercalciuria എന്ന ജന്മനാ ഉള്ള ഒരു അവസ്ഥയാണ്. ഇത്തരക്കാരില്‍ കിഡ്നി വഴി പുറം തള്ളപ്പെടുന്ന കാല്‍സ്യത്തിന്റെ അളവ് സാദാരണക്കാരിലും കൂടുതലായിരിക്കും. എന്നാല്‍ രക്തത്തിലെ കാല്‍സ്യത്തിന്റെ അളവ് നോര്‍മല്‍ ആക്കി നിര്‍ത്താന്‍ ശരീരത്തിന് വളരെ മികച്ച സംവിധാനങ്ങള്‍ ഉള്ളതിനാല്‍ ഇവരില്‍ രക്തത്തിലെ കാല്‍സ്യം നോര്‍മല്‍ ആയിരിക്കും.  ഭക്ഷണത്തിലെ ചില ക്രമീകരണങ്ങള്‍ ഇത്തരം ആളുകളില്‍ അത്യാവശ്യമാണ്. കാല്‍സ്യം കല്ലാണല്ലോ മൂത്രത്തില്‍ എന്ന് വിചാരിച്ചു ഭക്ഷണത്തിലെ കാല്‍സ്യം അളവ് കുറക്കെണ്ടതില്ല. സാദാരണ അളവില്‍ കാല്‍സ്യം കഴിക്കാം. എന്നാല്‍ മരുന്ന് രൂപത്തില്‍ അധിക കാല്‍സ്യം കഴിക്കുന്നത്‌ ഒഴിവാക്കേണ്ടതാണ്.  ഭക്ഷണത്തിലെ പ്രോടീന്‍ അളവും ഉപ്പിന്‍റെ അളവും കുറയ്ക്കുന്നത് ഇത്തരം കല്ലുകള്‍ രൂപപ്പെടുന്നത് തടയാന്‍ സഹായകമാണ് . ഉപ്പും മാംസാഹാരവും മറ്റു പ്രോടീന്‍ അധികമുള്ള ഭക്ഷണങ്ങളുമാണ് കുറയ്ക്കേണ്ടത് . മൂത്രത്തിലൂടെ പുറംതള്ളപ്പെടുന്ന കാല്‍സ്യത്തിന്റെ അളവ് കുറയ്ക്കാന്‍ ഉള്ള മരുന്നുകള്‍ ഇത്തരം കല്ലുകളുടെ ചികിത്സയ്ക്ക് ഉപയോഗപ്പെടുത്താം

Parathyroid ഗ്രന്ഥി ശരീരത്തിലെ കാല്‍സ്യത്തിന്റെ അളവ് നിയന്ത്രിക്കുന്നതില്‍ പ്രധാന പങ്ക് വഹിക്കുന്നു. Parathyroid ഗ്രന്ഥിയില്‍ ഉണ്ടാവുന്ന ചില ട്യൂമറുകള്‍ രക്തത്തിലെ കാല്‍സ്യം ക്രമാതീതമായി കൂട്ടുകയ്ടും കൂടുതല്‍ അളവില്‍ കാല്‍സ്യം പുറംതള്ളാന്‍ കിഡ്നി നിര്‍ബന്ധിതമാവുകയും ചെയ്യും. ഇത്തരം അവസ്ഥയില്‍ രൂപപ്പെടുന്ന കല്ലുകളുടെ ചികിത്സ എന്നാല്‍ parathyroid tumor സര്‍ജറി വഴി നീക്കം ചെയ്യുക എന്നതാണ് .

ശരീരത്തിലെ അമ്ല- ആല്കലി ബാലന്‍സ് നിലനിര്‍ത്താനുള്ള കിഡ്നിയുടെ കഴിവ് നഷ്ടപ്പെടുന്ന അസുഖങ്ങളില്‍ ( Renal tubular acidosis)കാത്സ്യം കല്ലുകള്‍ രൂപപ്പെടാം . ഈ അവസ്ഥയും വ്യക്തമായി നിര്‍ണ്ണയിക്കപ്പെട്ടുകഴിഞ്ഞു ചികിത്സയെടുത്താല്‍ കല്ലുകള്‍ അടിഞ്ഞു കൂടുന്നത് തടയാന്‍ കഴിയും

Calcium Oxalate കല്ലുകള്‍ ഭക്ഷണത്തിലെ Oxalate അളവ് കൂടുന്നത് കൊണ്ടും ചില ജനിതക തകരാറുകള്‍ കൊണ്ടും കുടലിനെ ബാധിക്കുന്ന ചില തരം അസുഖങ്ങള്‍ കൊണ്ടും വരാം. കുടല്‍ സംബന്ധമായ ചില സര്‍ജറികള്‍ക്ക് ശേഷവും ഇത്തരം കല്ലുകള്‍ രൂപപ്പെടാന്‍ ഉള്ള പ്രവണത കാണാറുണ്ട്‌. ചോക്കലറ്റ്, അണ്ടിപരിപ്പ് വര്‍ഗ്ഗങ്ങള്‍ , ചീര തുടങ്ങിയ oxalate കൂടിയ ഭക്ഷണങ്ങള്‍ ഇത്തരം രോഗികള്‍ ഒഴിവാക്കേണ്ടതാണ്.  Oxalate കല്ലുകള്‍ രൂപപ്പെടാനുള്ള അടിസ്ഥാന കാരണത്തിനനുസരിച്ചാണ് ചികിത്സ തീരുമാനിക്കുന്നത്‌ .

യൂറിക് ആസിഡ് കല്ലുകളാണ് മറ്റൊരു പ്രധാന ഇനം . പ്രോടീന്‍ ഭക്ഷണം കൂടുതല്‍ കഴിക്കുന്നത്‌ യൂറിക് ആസിഡ് കല്ലുകള്‍ രൂപപ്പെടാന്‍ കാരണമായേക്കാം . കാന്‍സര്‍, കാന്‍സര്‍ ചികിത്സ, ചില ജനിതക രോഗങ്ങള്‍ എന്നിവയെല്ലാം യൂറിക് ആസിഡ് കല്ലുകള്‍ക്ക് കാരണമാവാം.  യൂറിക് ആസിഡിന്റെ അളവ് കുറയ്ക്കാന്‍ മരുന്നുകള്‍ ലഭ്യമാണ്.  ക്ഷാര ഗുണമുള്ള മൂത്രത്തില്‍ യൂറിക് ആസിഡ് അലിഞ്ഞു പോവുന്നതിനാല്‍ മൂത്രത്തിന്റെ  ക്ഷാര ഗുണം കൂട്ടുന്ന മരുന്നുകളും യൂറിക് ആസിഡ് കല്ലുകളുടെ ചികിത്സയില്‍ ഉപയോഗിക്കുന്നു.

Cystine stones :
പൊതുവേ അപൂര്‍വ്വമായി കാണപ്പെടുന്ന കല്ലുകളാണ് ഇവ. ജന്മനാ മൂത്രത്തിലെ cystine അളവ് കൂടുന്നതാണ് ഇത്തരം കല്ലുകള്‍ക്ക് കാരണം . ഉപ്പു കുറയ്ക്കല്‍, മൂത്രം ക്ഷാര ഗുണം കൂടിയതാക്കല്‍ , ധാരാളം വെള്ളം കുടിച്ചു മൂത്രത്തിന്റെ അളവ് മൂന്നു ലിറ്ററിന് മുകളില്‍ നിലനിര്‍ത്തല്‍ തുടങ്ങിയവ വഴി ഇത്തരം കല്ലുകളെ തടയാം.

Struvite stones:

സ്ഥിരമായി മൂത്രത്തില്‍ പഴുപ്പ് ഉണ്ടാകുന്ന ആളുകളിലാണ് ഇത്തരം കല്ലുകള്‍ കാണപ്പെടുന്നത്.  പ്രത്യേകിച്ച് കാര്യമായ ലക്ഷണങ്ങള്‍ ഒന്നും ഇല്ലാതെ, മറ്റു തരം കല്ലുകളില്‍ നിന്ന് വ്യത്യസ്തമായി അത്ഭുതകരമാം വിധം വലിപ്പത്തില്‍ ഇവ രൂപപ്പെടാം. ചിലപ്പോള്‍ വളര്‍ന്നു വളര്‍ന്നു കിഡ്നിയെ തന്നെ പൂര്‍ണ്ണമായും നശിപ്പിച്ചു കളഞ്ഞേക്കാം . അതിനു ശേഷമായിരിക്കും കല്ലിനെ കുറിച്ച് അറിയുന്നത് തന്നെ. ഇത്തരം കല്ലുകള്‍ സര്‍ജറി വഴി നീക്കം ചെയ്യേണ്ടതുണ്ട്. മൂത്രത്തിലെ അണുബാധ പൂര്‍ണ്ണമായും ഇല്ലാതാക്കാന്‍ ചിലപ്പോള്‍ വളരെ കാലം തുടര്‍ച്ചയായി മരുന്നുകള്‍ കഴിക്കേണ്ടിയും വരാം. Cystine, Uric acid കല്ലുകളും ചിലപ്പോള്‍ ഇത്തരത്തില്‍ വളര്‍ന്നു വലുതാവാം

എന്തൊക്കെയാണ് മൂത്രക്കല്ലിന്റെ ലക്ഷണങ്ങള്‍ ?

കിഡ്നിയുടെ ഉള്ളില്‍ ഇരിക്കുന്ന കല്ലുകള്‍ പ്രത്യേകിച്ച് ലക്ഷണങ്ങള്‍ ഒന്നും തന്നെ കാണിക്കണമെന്നില്ല. ഈ കല്ലുകള്‍ , കിഡ്നിയില്‍ നിന്നും മൂത്ര സഞ്ചി വരെ പോവുന്ന യുരീറ്റര്‍ കുഴലിലൂടെ സഞ്ചരിക്കുമ്പോള്‍ അവിടെ ഉണ്ടാക്കുന്ന മുറിവുകളാണ് ശക്തമായ വേദനയായി രോഗി അനുഭവിക്കുന്നത് . സാധാരണയായി പതിയെ തുടങ്ങി ക്രമേണ ശക്തി കൂടി പിന്നീട് അല്‍പ്പം കുറഞ്ഞു വീണ്ടും ശക്തമായി തിരിച്ചു വരുന്ന രൂപത്തിലാണ് കല്ല്‌ മൂലം ഉണ്ടാവുന്ന വേദന അനുഭവപ്പെടാറ്. ചിലപ്പോള്‍ വേദനയുടെ കൂടെ ചര്ധിയും കാണാറുണ്ട്‌. മൂത്രത്തില്‍ നേരിയ രൂപത്തില്‍ രക്തത്തിന്റെ അംശവും കണ്ടേക്കാം.. കല്ല്‌ ഇരിക്കുന്ന സ്ഥലത്തിനനുസരിച്ചു ഇടുപ്പിലെക്കോ ജനനേന്ദ്രിയത്തിന്റെ ഭാഗത്തേക്കോ വേദന വ്യാപിക്കം. ഇടയ്ക്കിടെ മൂത്രം ഒഴിക്കാന്‍ തോന്നലും ചിലപ്പോള്‍ മൂത്രം ഒഴിച്ച് കഴിഞ്ഞു നീണ്ടു നില്‍ക്കുന്ന അസ്വസ്ഥതയും കല്ല്‌ മൂലം ആവാം..

രോഗ നിര്‍ണ്ണയം എങ്ങനെ?
വേദനയുടെ സ്ഥലവും കടുപ്പവും മറ്റു ലക്ഷണങ്ങളും വച്ച് കല്ല്‌ കൊണ്ടുള്ള വേദനയാണെന്ന് ഏതാണ്ട് ഊഹിക്കാന്‍ കഴിയുമെങ്കിലും ഉറപ്പു വരുത്താന്‍ ടെസ്റ്റുകള്‍ ചെയ്യേണ്ടതുണ്ട്.  ആദ്യ കാലത്ത് വയറിന്‍റെ X ray പരിശോധന ഇക്കാര്യത്തിന് വേണ്ടി വ്യാപകമായി ഉപയോഗിച്ച് വന്നിരുന്നു. എന്നാല്‍ x ray യില്‍ തെളിഞ്ഞു വരാത്ത തരം കല്ലുകള്‍ ഉണ്ട്. തീരെ ചെറിയ കല്ലുകള്‍ X ray വഴി കണ്ടു പിടിക്കാന്‍ കഴിയില്ല.  Ultra sound scan വ്യാപകമായതോടെ കല്ല്‌ തിരിച്ചറിയാന്‍ x ray പൊതുവില്‍ ഉപയോഗിക്കതെയായി. ഒട്ടു മിക്ക കല്ലുകളും ultrasound വഴി കണ്ടു പിടിക്കാം.. പക്ഷെ തീരെ ചെറിയ കല്ലുകള്‍ കാണാതെ പോവാനുള്ള സാധ്യത അപ്പോഴും ഉണ്ട്. CT സ്കാന്‍ ആണ് കൂടുതല്‍ മികച്ച കൃത്യതയുള്ള ടെസ്റ്റ്. പക്ഷെ കൂടിയ ചിലവും എല്ലാ ആശുപത്രികളിലും CT സ്കാന്‍ ലഭ്യമല്ലതതിനാലും  Ultrasound സ്കാന്‍ തന്നെയാണ് ഇപ്പോഴും കൂടുതല്‍ ഉപയോഗിക്കപ്പെടുന്നത്.  എന്നാല്‍ സര്‍ജറി, ESWL  തുടങ്ങിയ ചികിത്സകള്‍ കല്ലിനു വേണ്ടി ചെയ്യുന്നതിന് മുന്നേ CT സ്കാന്‍ എടുക്കേണ്ടി വരും

മൂത്രം പരിശോധിക്കുന്നതിലൂടെ കല്ലുകള്‍ ഉണ്ടെന്നു ചില സൂചനകള്‍ ഒരു പക്ഷെ കിട്ടിയേക്കാം. പക്ഷെ വ്യക്തമായ ഒരു നിഗമനത്തില്‍ ഏതാണ കഴിയില്ല.

മറ്റു ടെസ്റ്റുകള്‍ :-

കല്ലിന്റെ സാന്നിധ്യം മനസിലാക്കാനും വേദന കുറയ്ക്കാന്‍ ഉള്ള മരുന്നുകള്‍ നല്‍കാനും മുകളില്‍ പറഞ്ഞ ടെസ്റ്റുകള്‍ മതിയാവും. നിര്‍ഭാഗ്യവശാല്‍ പലപ്പോഴും ടെസ്റ്റുകള്‍ അവിടെ അവസാനിക്കാറാണ് പതിവ്. എന്നാല്‍ ഇതു തരത്തിലുള്ള അസുഖം മൂലമാണ് കല്ലുകള്‍ രൂപപ്പെടുന്നത് എന്ന് മനസിലാക്കാന്‍ മറ്റു ടെസ്റ്റുകള്‍ ആവശ്യമാണ്‌. 24 മണിക്കൂര്‍ ഒഴിക്കുന്ന മൂത്രം ശേഖരിച്ചു അതിലെ കാത്സ്യം, യൂറിക് ആസിഡ്, Oxalate, Citrate, PH തുടങ്ങിയവ മനസിലാക്കേണ്ടതുണ്ട്. അത് പോലെ തന്നെ രക്തത്തിലെയും മേല്‍ പറഞ്ഞ ലവണങ്ങളുടെ അളവ് പരിശോധിക്കേണ്ടതുണ്ട്. ഇവയില്‍ എന്തെങ്കിലും തകരാര്‍ കണ്ടെത്താന്‍ കഴിഞ്ഞാല്‍ അവ പരിഹരിക്കാന്‍ ശ്രമിക്കുന്നത് കല്ലുകള്‍ വീണ്ടും ഉണ്ടാവാതിരിക്കാന്‍ സഹായകമായിരിക്കും. മൂത്ര കല്ലിന്റെ അസുഖം ഉള്ളവര്‍ ഒരു അരിപ്പയിലൂടെ മൂത്രം ഒഴിക്കുന്നത് പുറത്തു പോവുന്ന കല്ല്‌ ശേഖരിക്കാന്‍ സഹായിക്കും. ഇത്തരത്തില്‍ പുറം തള്ളപ്പെടുന്ന കല്ലുകളെ chemical പരിശോധനക്ക് വിധേയമാക്കുന്നത് അതിനനുസരിച്ചുള്ള ചികിത്സ തെരഞ്ഞെടുക്കാന്‍ സഹായിക്കും.  എന്നാല്‍ മേല്‍ പറഞ്ഞ ടെസ്റ്റുകള്‍ അല്‍പ്പം ചിലവേറിയതും പല ലാബുകളിലും ലഭ്യമല്ലാത്തതും ഒരു പ്രശ്നമാണ്.

ചികിത്സ എങ്ങനെ ?

ഓരോ തരം കല്ലുകളുടെയും പൊതുവേയുള്ള ചികിത്സയെകുറിച്ചു നേരത്തെ സൂചിപ്പിച്ചുവല്ലോ.. വേണ്ടത്ര അളവില്‍ വെള്ളം കുടിച്ചു 3- 3.5 മൂത്രം ഉറപ്പുവരുത്തലാണ് കല്ല്‌ വരാതിരിക്കാനും വന്നവ പുറം തള്ളപ്പെടാനും ഏറ്റവും ഫലപ്രദമായ മാര്‍ഗ്ഗം.  5mm വരെ വലിപ്പമുള്ള കല്ലുകള്‍ ഇത്തരത്തില്‍ എളുപ്പത്തില്‍ പുറംതള്ളപ്പെടും. യുരീട്ടരില്‍ സ്ഥിതി ചെയ്യുന്ന കല്ലുകള്‍ കൂടുതല്‍ വേഗത്തില്‍ പുറം തള്ളപ്പെടാന്‍ ചില മരുന്നുകള്‍ നിലവിലുണ്ട്.  എന്നാല്‍ അതിലും കൂടുതല്‍ വലിപ്പമുള്ള കല്ലുകള്‍ പുറത്തെടുക്കാന്‍ മറ്റു മാര്‍ഗങ്ങള്‍ സ്വീകരിക്കേണ്ടി വന്നേക്കാം..

നിര്‍ബന്ധമായും കല്ലുകള്‍ നീക്കം ചെയ്യേണ്ട സാഹചര്യങ്ങള്‍ എതെല്ലാം?

- മരുന്ന് കൊണ്ട് മാറാത്ത കടുത്ത വേദന
- മൂത്രത്തിന്റെ സുഖമമായ പ്രവാഹത്തിന് തടസ്സം.
- അണുബാധ
-ശക്തമായ രക്തസ്രാവം
മേല്‍ പറഞ്ഞ സാഹചര്യങ്ങളിലാണ് കല്ലുകള്‍ അത്യാവശ്യമായി എടുത്തു കളയേണ്ടത്‌.

ആധുനിക ചികിത്സാ രീതികള്‍ വന്നതോടെ വലിയ മുറിവ് ഉണ്ടാക്കി കിഡ്നിയുടെ അടുത്തേക്ക് എത്തുന്ന തുറന്ന ശസ്ത്രക്രിയകള്‍ ആവശ്യമില്ലാതായി.. മുറിവ് ഇല്ലാതെയോ തീരെ ചെറിയ മുറിവ് ഉണ്ടാക്കിയോ കല്ലുകള്‍ പുറത്തെടുക്കാന്‍ നിലവില്‍ മാര്‍ഗ്ഗങ്ങള്‍ ഉണ്ട്..

1. PCNL ( Percutaneous nephrolitholithotomy)
തൊലിപ്പുറത്ത് വളരെ ചെറിയ മുറിവുണ്ടാക്കി, ട്യൂബ് പോലെ ഒരു ഉപകരണം കടത്തി കിഡ്നിയിലെ കല്ല്‌ ലേസര്‍ ഉപയോഗിച്ചോ സൗണ്ട് വേവ് ഉപയോഗിച്ചോ പൊടിച്ചു കളയുന്ന രീതിയാണിത്..  കല്ല്‌ മൂലം മൂത്രക്കുഴലില്‍ ഉള്ള തടസം മാറ്റി മൂത്രത്തിന്റെ ഒഴുക്ക് സുഖമമാക്കാന്‍ ഇതോടൊപ്പം മൂത്ര നാളിയിലൂടെ ചെറിയൊരു ട്യൂബ് ഇട്ടു വെക്കാറുണ്ട്. ഇത് പിന്നീട് എടുത്തു കളയാവുന്നതാണ്.

2. ESWL ( Extra corporeal shock wave lithotripsy)

ഉയര്‍ന്ന ഊര്‍ജ്ജം ഉള്ള ശബ്ദ തരംഗങ്ങള്‍ ഉപയോഗിച്ച് കല്ലുകള്‍ ചെറിയ കഷങ്ങളാക്കി മാറ്റുന്ന ചികിത്സാ രീതിയാണിത്. തൊലിപ്പുറത്ത് മുറിവുണ്ടാക്കേണ്ട ആവശ്യമില്ല ഈ ചികിത്സാ രീതിക്ക്. വലിയ കല്ലുകള്‍ ചെറിയ കഷ്ണങ്ങളായി മാറിക്കഴിഞ്ഞാല്‍ സ്വാഭാവികമായും മൂത്രത്തിലൂടെ പുറംതള്ളപ്പെടും എന്നതാണ് ഈ ചികിത്സയുടെ തത്വം.

3. Ureteroscopic removal :
മൂത്ര നാളിയിലൂടെ ഒരു ട്യൂബ് കടത്തി മൂത്ര സഞ്ചി വഴി യുറീറ്ററില്‍ എത്തി കല്ല്‌ എടുത്തു കളയുന്ന രീതിയാണിത്.  കിഡ്നിയില്‍ നിന്നും അകലെ, മൂത്ര സഞ്ചിയോട് ചേര്‍ന്ന് കിടക്കുന്ന യുറീറ്ററിലെ കല്ലുകള്‍ നീക്കം ചെയ്യാനാണ് പൊതുവേ ഈ രീതി ഉപയോഗപ്പെടുത്തുന്നത്.. എന്നാല്‍ കൂടുതല്‍ അകലത്തില്‍ കിഡ്നിയോട് ചേര്‍ന്ന് കിടക്കുന്ന കല്ലുകളും ഈ രീതിയില്‍ നീക്കം ചെയ്യാന്‍ കഴിയും

ഒമാനിലെ ഇബ്രിയിലേക്ക്  ജീവിതം പറിച്ചു നടുന്നതിന് മുന്നേ ഒരു അന്വേഷണം നടത്തിയിരുന്നു.. ഇബ്രിയുടെ അടുത്തൊക്കെ കാണാന്‍ കൊള്ളാവുന്ന സ്ഥലങ്ങള്‍ ഉണ്ടോ എന്ന്.. ഇല്ല എന്നായിരുന്നു ആദ്യം കിട്ടിയ വിവരം.. പക്ഷെ ഇവിടെ വന്ന ശേഷം മനസിലായി ആ ധാരണ ശരിയല്ല എന്ന്.  ഗൂഗിളില്‍ തിരഞ്ഞപ്പോളാണ്  ഇബ്രിയില്‍ നിന്നും അധികം ദൂരത്തിലല്ലാത്ത, UNESCO പൈതൃകങ്ങളുടെ കൂട്ടത്തില്‍ ഉള്‍പ്പെടുത്തിയ ഈ സ്ഥലത്തെ കുറിച്ച് അറിഞ്ഞത്.  പോവണം എന്ന് അന്ന് തന്നെ തീരുമാനിച്ചെങ്കിലും കുറെ ആഴ്ചകള്‍ക്ക് ശേഷമാണ് സമയം ഒത്തുവന്നത് .  ഫോട്ടോഗ്രഫി കമ്പമുള്ള, കൂടെ ജോലി ചെയ്യുന്ന സുഹൃത്തുക്കളുടെ കൂടെയായിരുന്നു യാത്ര.

ലോഹ യുഗത്തിലേക്ക് നീളുന്നതാണ് ബീഹൈവ് ടോമ്പിന്റെ  ചരിത്രം. ഇവിടെ നിന്ന് മനുഷ്യരുടെയോ  മൃഗങ്ങളുടെയോ ഫോസ്സിലുകള്‍ ഒന്നും കണ്ടെടുക്കപ്പെട്ടിട്ടില്ല എന്ന് പറയപ്പെടുന്നെങ്കിലും  ഇവ ശവകുടീരങ്ങള്‍ തന്നെയാണ് എന്നാണു അനുമാനം.

ഇബ്രിയില്‍ നിന്നും 64km അകലെ അലൈന്‍ എന്ന സ്ഥലത്താണ് ഈ  ടോമ്പുകള്‍ സ്ഥിതിചെയ്യുന്നത്.  Maps.me എന്ന ഓഫ് ലൈന്‍ മാപിന്റെ സഹായത്തോടെയാണ് ഞങ്ങളുടെ യാത്ര.